Германската јавност незадоволна од владата и канцеларот Мерц, бара поголем притисок врз Израел
Според најновата анкета спроведена за јавниот сервис ARD, голем дел од Германците се незадоволни од работата на владата и канцеларот Фридрих Мерц, особено во однос на надворешната политика.
Дури 69 отсто од граѓаните не се задоволни од работата на федералната влада, а 65 отсто негативно го оценуваат и канцеларот Мерц. Половина од испитаниците сметаат дека Мерц не е способен да ја води Германија во кризни времиња, а 57 отсто не се задоволни од неговата политика кон Украина.
Во надворешната политика, Мерц се истакна со поддршка на Украина и повици до Израел за воздржаност во појасот Газа, но јавноста очекува поголем притисок врз Израел во однос на хуманитарната криза. Анкетата покажува дека 66 отсто сметаат дека владата треба да го зголеми притисокот за промена на курсот на Израел, а 72 отсто го сметаат прашањето на заложниците од Хамас за највисок приоритет.
Во внатрешната политика, владата воведе поостар курс кон миграцијата, додека Мерц го овозможи олеснувањето на строгиот „долговен лимит“ за инвестирање во инфраструктура и модернизација, што предизвика пад на неговиот рејтинг.
Популарноста на Мерц падна на 32 отсто, што го поставува на третото место зад премиерот на Баварија, Маркус Зедер (38 отсто), и министерот за одбрана Борис Писториус (60 отсто).
Политичкиот тренд во Германија се поместува кон десно, со зголемена поддршка за десничарската партија Алтернатива за Германија (AfD), која сега ужива околу 20 отсто поддршка. Анкетата укажува дека доколку изборите се одржат наскоро, CDU/CSU би добиле 27 отсто, додека AfD би имал 24 отсто од гласовите.
Во економската сфера, 65 отсто од Германците се загрижени поради нестабилноста предизвикана од нејасната царинска политика на американскиот претседател Доналд Трамп.
Овие податоци покажуваат растечко незадоволство од сегашната политика и поголема поларизација во германското општество.
