Италијанската влада официјално даде зелено светло за изградба на најдолгиот висечки мост во светот, кој ќе го поврзе островот Сицилија со копнениот дел на земјата – преку Месинскиот Теснец. Проектот, чија вредност изнесува 13,5 милијарди евра, ќе се финансира со средства од државниот буџет.
По децении планирање, промени и контроверзии, министерскиот комитет конечно го одобри планот, објави министерот за транспорт и инфраструктура, Матео Салвини.
„Ова ќе биде најдолгиот мост во светот со еден распон и ќе претставува вистински двигател на развојот за сиромашните региони на двете страни – островот Сицилија и јужната област Калабрија“, изјави Салвини на прес-конференција.
Светски инженерски подвиг
Според проекцијата, мостот ќе има централен висечки распон од 3,3 километри – што претставува светски рекорд – со двe главни кули високи по 400 метри. Централниот дел ќе биде опремен со две железнички линии и по три коловозни ленти од секоја страна.
Владата тврди дека конструкцијата ќе биде технолошки врв, способна да издржи силни ветрови и земјотреси, со оглед на тоа што регионот се наоѓа на спојот на две тектонски плочи. Очекувањата се мостот да биде завршен до 2032 година.
Работни места, критики и стара недоверба
Покрај ветувањата за десетици илјади нови работни места и економски бенефити за регионите, проектот предизвика и сериозни реакции во јавноста. Еколошки активисти предупредуваат на влијанието врз животната средина, додека критичарите укажуваат дека средствата би можеле да се насочат кон порелевантни инфраструктурни проекти.
Има и скептици кои сметаат дека мостот никогаш нема да биде изграден, повикувајќи се на историјата на бројни италијански инфраструктурни проекти кои иако биле најавувани и финансирани, никогаш не виделе реализација.
Првите идеи за изградба на мостот датираат уште од пред повеќе од 50 години. Во 2006 година, конзорциумот Eurolink, предводен од италијанската градежна компанија Webuild, победи на меѓународен тендер за изградба. Меѓутоа, проектот беше запрен по должничката криза во еврозоната. Сега, истиот конзорциум е реанимиран како главен изведувач на работите.
Мост со „одбранбена“ функција?
Интересен пресврт е одлуката трошоците за изградбата да се категоризираат како „воeни расходи“. Овој потег доаѓа откако Италија, заедно со другите НАТО-сојузници, прифати значително зголемување на воените буџети на барање на американскиот претседател Доналд Трамп – до 5% од БДП.
Според договорот, 1,5% од тие средства може да се наменат за т.н. „одбранбени сектори“ како што се кибер-безбедноста и критичната инфраструктура. Рим се надева дека мостот преку Месинскиот Теснец ќе влезе во оваа категорија, особено имајќи предвид дека на Сицилија се наоѓа стратешка база на НАТО.
Проектот е истовремено амбициозен инженерски подвиг и симболична инвестиција во обединувањето на Италија – и досега најголем тест за спојот на политика, економија и технологија во земјата.
