Германската влада планира да го измени системот на социјална поддршка за украинските бегалци кои ќе пристигнат по 1 април 2025 година. Според нацрт-законот, овие лица повеќе нема да имаат право на целосни надоместоци за граѓани, туку ќе добиваат пониски бенефиции според Законот за баратели на азил.
Мерката, како што се проценува, може да доведе до намалување на социјалната поддршка за околу 100 евра месечно по бегалец. Целта, според властите, е подобро управување со ресурсите и одговор на зголемениот прилив.
Украинците моментално се третираат според Директивата за привремена заштита на ЕУ, што им овозможува директен пристап до социјалната помош без поднесување барање за азил. Но, предложената измена ќе се однесува само на лицата кои ќе пристигнат по наведениот датум.
Во Германија моментално престојуваат околу 1,25 милиони бегалци од Украина, од кои 21.000 се новодојдени во периодот од 1 април до 30 јуни 2025 година.
Предлог-законот треба да биде усвоен од федералниот кабинет и горниот дом на парламентот, по што се очекува да стапи на сила до крајот на годинава.
