Распоредувањето на две американски нуклеарни подморници во близина на Русија, што го објави американскиот претседател Доналд Трамп, не претставува нова закана за Москва, но предизвикува загриженост поради неговиот темперамент, пишува хрватскиот портал Јутарњи лист.
Руските политичари и воени експерти во саботата го минимизираа значењето на овој потег. Поранешниот генерал на воздухопловните сили и сегашен пратеник во Државната дума, Леонид Ивлев, за државната новинска агенција ТАСС изјави дека Русија е добро информирана за ваквите американски маневри и не гледа ништо ново или заканувачко во нив.
Слично мислење изнесе и пратеникот Виктор Водолацки, кој рече дека секој обид да се заплаши Русија е бесмислен, имајќи ја предвид силата на нејзината нуклеарна флота.
Трамп во петокот објави на социјалните мрежи дека наредил две нуклеарни подморници да бидат распоредени во „соодветни зони“ како реакција на, како што рече, „многу провокативни“ коментари на поранешниот руски претседател Дмитриј Медведев. „Зборовите се многу важни и често можат да доведат до несакани последици. Се надевам дека ова нема да биде еден од тие случаи“, напиша Трамп.
Тој не појасни кои точно подморници се испраќаат – дали се на нуклеарен погон или носат нуклеарни боеви глави – ниту ги откри нивните позиции. Не објасни ниту на кои изјави на Медведев реагира.
Од 2022 година, Медведев, сега потпретседател на Рускиот совет за безбедност, е познат по серија агресивни и често нуклеарно обележани изјави, иако неговото реално влијание врз руската политика е ограничено.
Во понеделникот, Медведев возврати на изјавите на Трамп, обвинувајќи го дека игра „игра на ултиматуми“ и го предупреди дека Русија и натаму располага со нуклеарно оружје од советската ера.
