Премиерот Христијан Мицкоски изрази очекување дека новововедените американски царини за македонски производи, кои моментално изнесуваат 15 отсто, ќе бидат дополнително намалени по продолжувањето на преговорите во втората половина на август.
„Од 33% тие за нас се намалени на 15%. Ова е прва фаза, не е финален договор. По летните одмори на американската и македонската администрација, очекувам продолжување на разговорите со САД и дополнително намалување на царините,“ изјави Мицкоски за време на денешната посета на реконструираната Клиника за уво, нос и грло.
Според него, новите царини претставуваат преодна мерка во рамките на најавената трговска политика на претседателот Доналд Трамп, а преговорите ќе се водат со канцеларијата на трговскиот претставник на САД и надлежните македонски институции.
