Додека на стратешкото острово Пeнгху, на само 30 километри од главниот тајвански остров, одекнуваат експлозии за време на голема вежба за цивилна одбрана, тајванските власти испраќаат сериозно предупредување – „Кина е подготвена за напад“.
Во интервју за Sky News, заменик-министерот за надворешни работи на Тајван, Ву Чих-чунг, порача дека „граѓаните повеќе не смеат да бидат наивни“. Според него, Тајван сам не може да се спротивстави на моќниот кинески воен апарат, додека кинескиот претседател Си Џинпинг ја повикува својата војска да биде подготвена за акција до 2027 година.
Жителите на Пeнгху секојдневно чувствуваат зголемен притисок: кинеската крајбрежна стража постојано е присутна, а неидентификувани пловни објекти без ознаки често ја преминуваат линијата на разграничување во Тајванскиот Теснец.
Под водство на претседателот Лај Чинг-те, Тајван воведе построги безбедносни мерки – воен судски систем, апсења за шпионажа, депортации на проруски инфлуенсери – што дополнително ја зголеми тензијата со Пекинг. Кина го нарекува Лај „паразит кој го повикува уништувањето на Тајван“.
Воената активност на Кина е засилена: воени вежби, опкружување на островот и тестирање на нови инвазивни технологии како амфибиски мостови.
Во меѓувреме, американската политика е сè поинволвирана. Доналд Трамп го обвини Тајван за „кражба“ на американската чип-индустрија, воведе 32% царина и не се изјасни јасно дали би го бранел островот во случај на напад. Сепак, Тајван се обидува да ги зачува врските со Вашингтон – компанијата TSMC најави инвестиции од 100 милијарди долари во САД.
И покрај напорите за јакнење на одбранбените капацитети, Тајван заостанува зад плановите. До април 2025 година се произведени само 5% од планираните 180.000 дронови. Рускиот напад врз Украина, според компанијата Thunder Tiger, бил „аларм“ за островот.
Иако владата и натаму се залага за зачувување на статус кво-то што го одржува мирот речиси 80 години, изгледа дека денес тој мир виси на конец.
