Драма на локалниот пат од Миравци кон познатото излетничко место „Бел Рај“ – 12 лица од повеќе градови низ Македонија биле уапсени изминатата ноќ во координирана полициска акција на СВР Струмица и ОВР Гевгелија.
Според информациите од МВР, рацијата се одвивала во периодот од 22.00 до 03.00 часот, а приведените се на возраст од 20 до 38 години, сите од Скопје, Кавадарци, Неготино, Радовиш и Берово.
Во осум различни случаи, при преглед на лицата и возилата со кои се движеле, полицијата пронашла марихуана, како и четири мистериозни виолетови таблети, за кои се сомнева дека се дрога.
Целиот случај е пријавен до Основното јавно обвинителство во Гевгелија, а против сите лица ќе бидат поднесени соодветни кривични пријави. Полицијата најави и дополнителни активности за спречување на слични собири со нелегални супстанци.
Истражувањето е во тек, а јавноста со нетрпение чека одговори – што точно се криело зад ноќниот собир кај „Бел Рај“?
