Федералниот административен суд во Лајпциг ја отфрли тужбата на германската партија Алтернатива за Германија (AfD), со што класификацијата на партијата како крајно десничарски „сомнителен случај“ стана правно обврзувачка. Судот не дозволи преиспитување на претходната пресуда донесена од Вишиот управен суд во Минстер, според која постојат доволни индиции дека дел од политичките цели на AfD се спротивставуваат на човековото достоинство и на демократскиот уставен поредок.
Судот посочи дека „постои основано сомнение“ дека барем значаен дел од партијата се залага за третман на германски граѓани од мигрантско потекло како граѓани од втор ред. Врз основа на таа проценка, Сојузната канцеларија за заштита на уставниот поредок има законско овластување да ја следи партијата со разузнавачки средства, вклучувајќи и регрутирање информатори од нејзините редови.
Иако AfD тврдеше дека судската постапка не е завршена и дека претходната одлука отстапува од постојната судска пракса, аргументите не беа прифатени. Според судот во Лајпциг, барањето за ревизија не ги исполнува критериумите, бидејќи пресудата е базирана на постојни законски одредби и не отвора нови правни прашања.
Паралелно со оваа постапка, веќе е во тек друг судски процес кој се однесува на новата класификација на AfD како партија со „потврдени екстремистички аспирации“, што е највисока категорија во германскиот систем на набљудување на екстремизам. Таа постапка се води пред Управниот суд во Келн и засега е во почетна фаза. Според Дојче веле, би можеле да поминат години пред да се донесе конечна и правно обврзувачка одлука по ова прашање.
