Израелските воздухопловни сили извршија нова серија воздушни напади врз областа на пристаништето Ходеида, на западниот брег на Јемен, како одговор на зачестените ракетни и дронски напади што Хутите ги спроведуваат врз Израел во последните недели, јавува агенцијата Хина.
Министерот за одбрана на Израел, Исраел Кац, изјави дека израелската армија дејствувала против „терористички цели на терористичкиот режим на Хутите во пристаништето Ходеида“, со цел да се спречи обновата на претходно уништената воена инфраструктура.
„Судбината на Јемен ќе биде иста како онаа на Техеран“, изјави Кац. „Хутите ќе платат висока цена за ракетните напади врз Државата Израел. Ќе продолжиме да дејствуваме, каде и кога ќе биде потребно, за да ја заштитиме нашата држава“, додаде тој.
Израелските одбранбени сили (IDF) соопштија дека нападите од воздух уништиле „воена инфраструктура на терористичкиот режим“. Како што беше наведено, мета биле градежни машини ангажирани на обнова на пристанишната инфраструктура, резервоари за гориво, како и пловни објекти што се користеле за воени активности и напади врз Израел и бродови во поморската зона во близина на пристаништето.
„IDF идентификуваше продолжени активности и обиди од страна на терористичкиот режим на Хутите за обнова на нивната инфраструктура во пристаништето. Поради тоа, беа гаѓани сите елементи што придонесуваат за развој на тие активности“, се наведува во соопштението на израелската армија.
Овие случувања дополнително ги зголемуваат тензиите во регионот на Црвеното Море, каде што конфликтот меѓу Израел и Хутите, кои уживаат иранска поддршка, добива сè поопасни размери.
