32-годишен скопјанец не застанал на знак „стоп“, негов сопатник оштетил полициско возило
Скопје, 19 јули – Во текот на ноќта, скопската полиција казни возач кој не застанал на даден знак „стоп“, а инцидентот добил дополнителна димензија откако еден од сопатниците оштетил службено полициско возило и побегнал.
Како што соопштија од Министерството за внатрешни работи, на 19.07.2025 година околу 01:15 часот на улицата „Благоја Стефковски“ во Скопје, при спроведување на сообраќајни контроли, полициски службеници дале знак „стоп“ на патничко моторно возило марка „Пежо“ со скопски регистарски таблички. Возилото не застанало веднаш, но било сопрено на улицата „Ордан Поп Јорданов“.
Констатирано е дека со возилото управувал Ф.Ј. (32) од село Петровец, а во возилото имало уште три машки лица. За сторените прекршоци биле издадени платни налози.
По завршување на службената дејност, додека полициските службеници влегувале во службеното возило, едно од трите лица од „Пежото“ со тврд предмет го удрило и искршило задното стакло на полициското возило, по што избегало од местото на настанот.
Од МВР информираат дека се преземаат мерки за целосно расчистување на случајот.
