Македонија и Бугарија постигнаа договор за заедничка изградба на прекуграничниот тунел на Деве Баир, според постоечкиот технички проект предложен од македонска страна. Средбата се одржа во Брисел со посредство на ЕУ и во присуство на претставници од Европската инвестициска банка, која најави техничка поддршка.
Работни групи од двете земји ќе го финализираат текстот на меѓувладиниот договор до крајот на јули, кој треба да се потпише наесен, а градбата да започне во 2026 година. Паралелно, Македонија ќе распише тендер за делницата од Крива Паланка до тунелот до крајот на 2025.
Бугарија ќе отвори тендер за своите 2,4 км пруга од Ѓуешево до средината на тунелот до крајот на јули 2025, со обезбедени 69 милиони евра од Програмата за транспортна поврзаност 2021–2027. Планирани се инвестиции од над 1,5 милијарди евра за целата делница Софија–граница со Македонија.
На македонска страна е завршена трасата Куманово–Бељаковце, а се гради делницата до Крива Паланка. Проектот има силна поддршка од Европската Унија и НАТО, бидејќи железничкиот Коридор 8 е дел од поширокиот план за поврзување на Јадранското со Црното Море.
